مراكش الحمراء // ثقافة
قصيدة زجلية ******** نعم أسي
وخا أنا سايح و بوهالي
راني حاضي سواري .
نفرق بين ألوان المنجج
وحلاوة العسل ومرارة الحدج
وخطوات الرجلين فوق الثلج .
لساني .خطرة خطرة .يعثر
كي يعجبني ملي يعري الزمر .
ديما طالع للجبل
باغي يعري المخزون
وينوض النحل .
علاه رجعت السيبة ؟
راه بينا وبينهم غير سبيبة
وراهم عارفين أش ف الزبيبة .
هاذ الشي .دابا علامن ؟
واش كلام ولا معاني ؟
وشكون بغى يتمعن ؟
فيا و لى ف لمعاني ؟ .
أنا غير سايح و بوهالي
تابع كلام لساني
حتى جوادي خواو لمكان وسلمو
قالو ليا .حتى نت راك ب براكتك
أنا يسحاب لي .قالو براكتك
وانا براكتي الداها الماء .وخلا جوادي .
ما خديت والو
قالو ليا .ما تسالش
شحال ف الصف وأنا واقف
دخلو غير واحد الحالف
حيث أنا بلى شحمة بلى يدام
بالحق طحت عليهم ثقل
وطاحو عليا باطل.
أنا ما مقلقش .غير مفقوص
الداو ليا بزاف وما باغي والو
عرفتو علاش ؟
حيث ما عنديش القرطاس
وا غير ذيال الشمع ..غير ذيال الشمع .
والشمع غير ضو
وخا دموعو جامدين
راه كي تقطرو ليا فقلبي
هو لي بغى
بهم يتحمى
من ذنوب الحسد
وشوك الحقد
خليه يعرف بحقي
ووصيتي ليه .
راني قلت ليكم .ما مقلقش .غير مفقوص .
عريت ليه ع القاعة
وهو يجمع حب وثبن .
أنا ما ديروش بحسابي
تسحرت مع الذراري
وكي تسالني الدين
دين مول الكراء ومول الحانوت
وحتى دين لخوت لدفنو حيين
ومعندهم لا قبر لا سمية .
بالحق ماناويش نخوي لبلاد
كنسال فيها حقي
ولي باع حقو
يبقى ورى السلك .
علاش أنا جيت ؟
جيت على رجلي
باغي نزور لحباب
وندي دموع الشمعة لوزين .
ودموعي شكون غادي يديهم ؟
هي .بغات غير ضحكتي
وهوما بغاو غير جهدي
وأنا .أش بغيت ؟
بغيت لحليب لي رضعتو
يشربوه قطران .
والصدر لي توسدتو
يتوسدوه جمر لفران .
هزو يديكم
وقولو أمين .
هذي ما شي حلقة
هذي محكمة
قول إلى عندك باقي ما تقول
لحكام خارج شحال هذا .
ماشي من المحكمة
من ألو ألو
نعم أسي ألو
الزجال // ابرهيم زرقة // اليوسفية
Aucun commentaire:
Enregistrer un commentaire