مراكش الحمراء // تقافة
زجل // ذ. حسني كمال
ولفونا ساكتين و نهار هضرنا ما عجبهم حال
شكون اللي قال ؟
حكامنا قلوبهم قاسية حجر!!!!
و شكون اللي قال ؟
اللي بغا الحياة
خاصو يستجب للقدر .....
شكون كان سباب هاذ البلا؟؟؟
أقوام عايشة في العز....
و ناس محرومة ليها تنظر.
شكون اللي سد الصباح
بليل طال ظلامو؟؟؟
و شكون طلع على ظهورنا
باش يكبر في مقامو؟
شكون كلا ما شبع
و مسح فينا وسخ يدامو؟؟؟
و شكون حبس علينا الماء ديال الواد...
و خلانا نشربو من الضاية ؟؟؟؟
و شكون اللي كنز موالنا ...
و قال لينا هذه الدنيا فانية؟؟
شكون سرق لينا ألوان البهجة من الحياة ....
و خلا لنا الظروف القاسية؟؟؟
شكون ؟؟؟؟و شكون ؟؟؟؟؟ و شكون؟؟؟؟
نوض فيق يا جنس يا مغبون!!!
قزبو ليك نهارك ...
و حرموك حتى من الشمس...
قلموا ليك ظفارك
و عاد كلامك كله همس
لا من شاف لا من سمع..
كلها يضرب على عرامو!!!
شحال منهم كان حاسب راسو سبع...
نهصروه تكمش و عرف مقاموا.
تأملت أمري و شحال بكيت...
لقيت راسي في حرب ....
سلاحو قلم و قافية.
طواحن الهواء عليها ما قديت...
واش انا دون كيشوط
و لا رومل و لا ولد شافية.
الهم و التخمام عياني ..
و منك يا دنيا قلت خزيت.
صيحت صيحة باش نفاجي همي ...
ما سمعوني ولاد العفاريت
كلها مدهي مع شغلو ..
و الضعيف ليه الله.
اذا بغيتوا تعرفوا بلا ما تسولوا..
راه اللي طاح على شي داه.
الهضرة الكبيرة و الأخلاق الحميدة
بقاواو مسجونين في صفحات الكتوب.
رزق الضعيف داز لجيوبهم...
برق ما تقشع وخا كلشي محسوب.
الكلاب ما تنبح غير الا ...
ما شمشمت ريحة الغاشي!!!!!!
و الذئاب ما تفرح .....
غير اذا ما فرسات قطعان المواشي.
المغرب // الدار البيضاء
Aucun commentaire:
Enregistrer un commentaire